Без разлика дали станува збор за стара или нова методологија на преговарање, отворањето на преговорите не смее да се забави, бидејќи тука се работи само за политичка волја, порача денеска шефот на италијанската дипломатија, Луиџи ди Мајо. Тој денеска престојува во Скопје, а на заедничката прес-конференција со шефот на дипломатијата, Никола Димитров нагласи дека би било амбициозно да дава гаранција за динамиката на новата методологија.
„Да ја гарантираме брзината со која ЕУ ќе се движи е многу амбициозна работа. Ние сме 27 држави, сите треба да одлучат, но нашата заложба е сето тоа да биде што побрзо – за новата методологија и за отворање на преговорите. Дали методологијата е стара или нова, сепак, клучната точка е дека не смее да се забави отворањето на преговорите, бидејќи тука се работи само за политичка волја“, рече Ди Мајо и додаде дека доколку земјите кои се основачи на ЕУ се обединети и компактни значи дека може да започне едно ново поглавје за граѓаните на Северна Македонија.
Димитров се надоврза дека би било прехрабро да се даде прогноза, имајќи ги предвид искуствата од јуни во 2018 година и јули и октомври лани.
„Ние мора, како што вика народот, сега да дуваме и на јогурт. Елементите за заеднички успех се тука. Се чини дека методологијата овозможи позитивни сигнали за придвижување на целиот процес. Следи извештајот од Комисијата и за двете досиеја и за македонското и за албанското и мислам дека ќе биде неверојатно крупна стратешка грешка ако таа шанса не ја зграпчиме и ние во регионот, меѓутоа и самата Европска унија“, додаде Димитров, кој напомена дека денеска е историски ден за земјата со оглед на ратификацијата на Протоколот за членство во НАТО во Собранието.
Разочарувањето што не добиввме датум за преговори во октомври, го претвориме во нов мотив за сите чинители во државата да работат понапорно и попосветено на нашето реформско досие, рече тој и се заблагодари за континуираната поддршка на официјален Рим во однос на остварувањето на стратешките цели – членство во НАТО и во ЕУ.