Малку одмор, малку освежување, средување на впечатоци, по некое пиво, па повторно на работа. Ракометарите на Вардар го доживеаја првиот пораз на домашен терен во последните 15 месеци, но вчерашниот од Кил е еден од оние што не болат. „Црвено-црните“ паднаа во СЦ „Јане Сандански“ меѓутоа излегоа како севкупни победници во двомечот со бундеслигашот и по вторпат во низа ќе заиграат на Фајналфор турнирот во Келн каде оваа година ќе патуваат како бранители на титулата.
„Знаевме дека ќе биде тешко до последна минута оти Кил е одлична екипа. Имавме и среќа за која велат дека ги следи храбрите. Загубивме, но задоволството е наше. Втора година по ред ќе играме на завршниот турнир што го заслуживме како награда за максималната работа низ целата сезона“, вели Тимур Дибиров по реванш четвртфиналниот дуел со Кил.
Раул Гонзалез истакна дека е горд на своите ракометари кои се погрижија да бидат први европски шампион што обезбедија прилика за бранење на тронот. Вардар не почна како што посакуваше, Ландин беше непремостлива пречка за нив во воведните минути од средбата и благодарение на неговите одбрани Кил направи серија од 0:3. Но, одговорот од ростерот на шпанскиот стручњак беше идентичен. „Црвено-црните“ возвратија со иста мерка по што минаа и во позитива што ја одржуваа во најголем дел од натпреварот. Грешките што се пројавија во завршницата ги искористија гостите од Германија за најпрво да фатат резултатски чекор за егал финиш во мечот што на крај го добија со 27:28. Меѓутоа правилото „повеќе голови во гости“, сепак, беше на страна на македонскиот претставник кој во „Шпаркасе арена“ триумфира со 29:28 кој одново се најави на спектаклот во Келн.
„Се соочивме со многу проблеми на теренот. Почнавме под притисок и не успеавме да се снајдеме најдобро со Ландин. Подоцна, сепак, се соземавме и со неколку погодоци од контри во второто полувреме и на крилја на публиката да дојдеме до посакуваниот резултат. Ќе следува малку одмор и зафаќање за работа бидејќи нè очекуваат два меча во Келн за кои мора да бидеме топ подготвени. Фаворити на завршниот турнир нема. Мора да одиграме на максимално ниво за победа“, истакна Раул Гонзалез.
Покрај Вардар, на Фајналфор турнирот во Германија се пласираа и триото француски екипи ПСЖ, Нант и Монпелје. Ждрепката за полуфиналните двојки е закажана во среда.