Државната изборна комисија денеска треба да одржи јавна седница за отповикување на донесените одлуки за определување на надоместок за членовите на Државна изборна комисија и вработените во стручната служба за спроведените избори.
Оваа одлука на ДИК следи, откако амбасадорот на САД Џес Бејли, вчера на предавање посветено на борбата против корупцијата кое се одржа на Факултетот за безбедност – Скопје ги посочи членовите на Државната изборна комисија дека си изгласале дополнителни бонуси за ангажманот за локалните избори.
Во соопштението од претседателот на ДИК Александар Чичаковски се вели дека „одлуките за надоместок се донесени согласно Закон и врз основа на позитивните законски прописи , но сепак членовите на ДИК утре ќе расправаат по предлог-одлука за отповикување на донесените одлуки за определување на надоместок за членовите на Државна изборна комисија и вработените во стручната служба за спроведените избори
– Претседателот и членовите на изборните органи и изборната администрација имаат право на надоместок согласно член 19 од Изборниот законик што се утврдува со акт што го донесува Државната изборна комисија. Ова право е утврдено за вработените во Државна изборна комисија од 2006 година, а за членовите на Државната изборна комисија од 2014 година – пишува во соопштението од ДИК.
Во соопштението пишува дека Правилникот за утврдување на критериумите за исплата на надоместокот на изборните органи е донесен по распишување на изборите во согласност со определениот буџет одобрен од страна на Собрание на Република Македонија и истиот е објавен на страната на Државната изборна комисија.
Од Државната изборна комисија велат дека од распишување до завршување на изборите се во постојано заседание, континуирано, без оглед на неработни денови и празници и работниот ден најчесто трае повеќе од 20 часа.