За премиерот Емил Димитриев, инструкциите кои ги добиваше од лидерот на ВМРО-ДПМНЕ, Никола Груевски, вели тие се поддршка и воопшто не треба да се сметаат за наредба.
При денешната посета на поплавените места во општина Илинден каде што Димитриев им вети на мештаните дека ќе добијат дополнителни пумпи за извлекување на водата, одговарајќи на прашањето на НОВА за акцијата на терен помеѓу лидерот на ВМРО-ДПМНЕ и Премиерот на државата, забележана на камерите, Димитриев вели:
„Не добивам инструкции. Јас така не гледам на тоа. Значи луѓето замолуваат за поддршка, тоа не треба да се сфати за наредба“.
Веднаш по поплавите кои најсилно го зафатија регионот на Арачиново, Стајковци и Сингилиќ, медиумите кои во јавноста важат за блиски до власта излегоа со информацијата дека Никола Груевски предвремено се вратил од одмор за да помогне, и истата вечер пред камерите координираше со министрите на терен, со Кризниот штаб, со армијата, со Дирекцијата за спасување како и со првиот човек на Владата.
Ова наиде на реакции по социјалните мрежи, каде голем број граѓани реагираа дека јасно се покажало дека партијата и државата не се одвоени кога наредбите ги давал поранешниот мандатар на Владата кој важи за најцврста алка во владејачката партија.