За да не се разочараме, подобро да не очекуваме добар исход, но мора да продолжиме да работиме, вели вицепремиерот Никола Димитров за очекувањата и најавите во декември да се случи деблокада на пристапните преговори на Северна Македонија со ЕУ на состанок на Советот за општи работи на ЕК.
Одговорно е од нашата страна да упатиме апел до граѓаните дека е подобро да бидеме изненадени од добар исход, отколку пак да бидеме разочарани од лош исход. Со оглед на краткиот период до Советот за општи работи на 14 декември, тогаш мислам дека е крајно неодговорно да создаваме било какви очекувања. Не смееме да се врзуваме за датуми по целото искуство што го имаме. Мислам дека сигналите од Софија упатуваат на некаков процес во билатералните односи кој, чекор по чекор, ќе помогне да се затвори прашањето. Кај нив очигледно уште парламентот ќе има улога, такви се најавите, рече Димитров во разговор за ТВ Клан Македонија.
Според Димитров, сега е важно да се одржи средба со новата влада во Софија, која ќе ги даде натамошните насоки за надминување на билатералниот спор.
„Многу е важно да има нешто и за нас и, пред сè, за народот, но и за сите други во регионот кои што гледаа надеж во овие решителни чекори што ги правевме во изминатите години за конечно да ги почнеме пристапните преговори со ЕУ. Тоа ќе зависи од оваа билатерална комуникација со Бугарија, но и од расположението на третите, кои имаат влог, кои се залагаат. Затоа што ова прашање стана европско, не е само билатерално прашање, бидејќи влијае на политиките на ЕУ кон регионот“, рече Димитров.