Српските одбојкарски репрезентативци ќе добијат дипломатски пасоши за освоената шампионска титула на Европското првенство што од 12 до 29 септември се одржа во Франција, во Словенија, во Белгија и во Холандија. Ова го најави Ивица Дачиќ, министер за надворешни работи во Владата на Србија, по денешното враќање на националниот тим во Белград. Репрезентацијата на Србија во финалето во Париз ја совлада Словенија со 3:1 (по сетови: 19:25, 25:16, 25:18, 25:20) и со девет победи во исто толку одиграни мечеви по третпат се искачија на тронот по 2001 година и 2011 година.
Златните момчиња на селекторот Слободан Ковач денеска имаа дочек каков што наликува на континентални шампиони. Одбојкарите во изминатите 17 дена се херои на нацијата, стотици граѓани ги пречекаа на аеродромот „Никола Тесла“ во Белград, а потоа беа примени и од претседателот Александар Вучиќ.
И Љубљана денеска беше на нозе од одбојкарски причини. Словенците масовно излегоа на улиците на главниот град да ги поздрават репрезентативците кои од Париз се вратија како вицешампиони. На Конгресниот плоштад во градот, покрај одбојкарите, дочек беше организиран и за велосипедистите Примож Роглич и Тадеј Погачар како и за носителите на златен медал од Светското првенство во кајак и кану.
Успехот на одбојкарите го честита и градоначалникот на Љубљана, Зоран Јанковиќ, а Олимпискиот комитет на Словенија побара 1 октомври да биде прогласен за национален празник Ден на спортот.