Директорката на неготинското средно училиште „Св. Кирил и Методиј“, Менча Зафирова од морални причини поднесе оставка, по настаните и обвинувањата поврзани со екскурзијата на средношколците во Италија.
Од Службата за односи со јавноста на Општина Неготино се наведува дека и покрај одличната соработка и многуте започнати и реализирани проекти со цел подобрување на условите за непречено одвивање на наставно-образовниот процес во училиштето, директорката Зафирова, иако, како што стои, не е директно виновна за случувањата на екскурзијата, од морални причини до градоначалникот Тони Делков доставила писмена оставка на функцијата вршител на должноста директор.
Градоначалникот Делков ја прифатил оставката, се заблагодарил на досегашната одлична соработка и најавил постапување согласно неговите законски овластувања.
Случајот со неготинските средношколци во јавноста стана актуелен преку два проблеми, од кои едниот го посочија родители на двајца ученици, кои биле оставени во хотелот во Италија, додека групата заминала на еднодневна екскурзија во Франција.
Другиот проблем го објави агенцијата организатор, која информира дека поради недоличното однесување на дел од учениците од оваа група, агенцијата партнер од Белград која посредува во организирање на екскурзијата, ја прекинува сорабоката со нив, а италијанските партнери не сакаат повеќе гости ученици од Македонија.
Во некои медиуми беа објавени згрозувачки фотографии од вршење нужда на подот на хотелски тоалет.
Советот на родители ја обвини Агенцијата која го организирала патувањето, а случајот го испитува и Министерството за образование и наука.
Од Министерството пред десетина дена соопштија дека ќе се бара одговорност од наставниците и директорот во случајот со екскурзијата, а Државниот просветен инспекторат ќе изврши увид во гимназијата и ќе ги даде своите препораки.