Денеска се навршуваат три година од вооружената пресметка во кумановската „Диво насеље“, која траеше два дена, при што животот го загубија осум припадници на Министерството за внатрешни работи:Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ кои посмртно беа одликувани со „Медал за храброст“ за покажаната исклучителна храброст и самопрегор во одбрана на територијалниот интегритет и суверенитет на Република Македонија од претседателот Ѓорге Иванов. Четириесетина беа повредени.
Покрај осумтемина припадници на полициските сили, беа убиени и 10 припадници на вооружената група.
37 лица обвинети за терористичка организација, тероризам и помагање
За „Диво насеље“ од февруари 2016 година во Кривичниот суд започна судски процес против 29 лица кои се товарат за сторени кривични дела „терористичка организација” и „тероризам”. Сите пред Судот се изјаснија дека се невини.
Случајот подоцна се спои со „Молња“ во кој се водеше постапка против осум лица – помагачи на вооружената група од „Диво насеље“, со што бројот на обвинети се искачи на вкупно 37.
Од 37 обвинети за тероризам и терористичка организација, 33 лица беа осудени за делата, а за четири лица е донесена ослободителна пресуда.
Кривичниот суд во ноември 2017 година на казна доживотен затвор осуди осуммина обвинети за терористичкиот напад во Диво Насеље, а 13 обвинети добија казна од 40 години затвор.
На казна затвор од 20 години се осудени петмина обвинети, две години помалку доби еден обвинет, а по двајца обвинети добија казна затвор од 14, 13 и 12 години.
Пресудата за овој случај требаше да биде донесена на 17 октомври, но беше одложена поради локалните избори на барање на МВР.
Обвинителството побара доживотен затвор за сите 37 обвинети за тероризам и терористичка организација.
Насер Рауфи, кој е еден од адвокатите на осудените, по изрекувањето на пресудата, рече дека ова е сценарио на тајните служби и дека не очекувал обвинетите да добијат толку високи казни. Тој смета дека станува збор за монтиран предмет и побара независна истрага.
Владата во ноември минатата година прифати да биде отворена меѓународна истрага за случајот „Диво насеље“.
Премиерот Зоран Заев изјави дека е информирана меѓународната заедница и оти се бараат начини за спроведување на меѓународна истрага за неразјаснетите околности поврзани со настаните во кумановската населба.
Косовската влада во ноември лани донесе одлука, да додели по 10.000 евра помош за семејствата на жртвите во Диво насеље, што од македонските власти беше оценета како „лоша одлука“.
Две години „Диво насеље“: Истите прашања и натаму без одговор
На 9 и на 10 мај 2015 година, во Диво насеље вооружена група се судри со безбедносните сили. Во престрелката загинаа осум полицајци од специјалните и од посебните единици на МВР, додека четириесетина беа тешко повредени. Убиени беа и десет лица од вооружената група.
Три години подоцна, има повеќе верзии за она што се случувало на 9 и 10 мај 2015 година.
Според една верзија, полицијата реагирала да неутрализира терористичка група која неколку месеци претходно веќе ја запоседнала кумановската населба и делувала како паралелна вооружена формација.
Според друга верзија, зад акцијата стои сценарио за одвлекување на вниманието на јавноста од „бомбите“ кои во јавноста почна да ги објавува опозицијата, а кои говореа за корупцијата во власта.