Последните неколку дена се историска пресвртница за евроатланските интеграции на Република Македонија која од Европскиот совет доби прецизна временска рамка за почеток на преговорите – јуни 2019 година – за полноправно членство во Европската унија (ЕУ), нагласи вицепремиерот за евроинтеграции Бујар Османи.
„Со оваа одлука на Европскиот совет добивме јасно признание за нашиот напредок од страна на Европската унија, всушност од сите нејзини земји членки, со што дефинитивно се затвора прашањето на европската иднина на Република Македонија“, рече Османи искажувајќи подготвеност на Владата да одговори на процесите поврзани со одлуката.
До 17 јули Македонија треба да го формира и преговарачкиот тим со ЕУ. Имајќи предвид колку долго Македонија го чекаше ја очекуваше оваа одлука за датум за почеток на преговорите, според Османи нашата администрација е подготвена да одговори на преговорите во процесот за кој истакна дека е многу скап.
„До 17 јули, кога се лансира скринингот, ние веќе треба да имаме имиња. Се работи за главен политички преговарач и за технички преговарач. Во делот на политичкото преговарање СЕП останува главен координатор на целиот тој процес. Кој ќе ја координира работата во техничкиот дел ќе одлучиме во наредните денови, рече Османи.
Политичкиот преговарач ќе ги координира министерствата, а техничкиот преговарач работните групи. Целата структура на преговарање се очекува да биде позната во наредните денови.
Османи најави континуитет во итните реформски приоритети, пред се, владеење на право, борба против организиран криминал и корупција, и како што посочува Советот, задржувајќи го и продлабочувајќи го досегашниот реформски момент.
„Ние сме целосно подготвени да одговориме на оваа агенда и овие предизвици“, рече Османи наведувајќи имплементација на сите реформи, пред се во правосудството, во безбедносните служби и во јавната администрација.
Вицепремиерот кажа дека СЕП е во последната фаза на подготовка на Планот 18 кој прераснува во план за преговори.
Македонија, потсети тој, треба да ги исполни и сите обврски од Договорот за спорот со името.
Османи ја поздрави и вчерашната одлука за поканата за членство на Македонија во НАТО.
Овие евроинтеграциски процеси, според вицепремиерот, ќе придонесат и за позицитивно влијание на економските текови во земјата и за поголем развој и раст.