Адвокатот на Сеад Кочан, Никола Додевски, за НОВА ТВ изјави дека не знае кога ќе се врати неговиот клиент кој се бара со меѓународна потерница.
„Не знам кога ќе се врати, јас сум само негов правен застапник. За ова прашање обратете се на друго место“, изјави Додевски за НОВА ТВ.
Сеад Кочан веќе 13 ден е недостапен за истражните органи. На 16 март Кривичниот совет на Основнито суд Скопје 1, му одреди мерка 30 дневен притвор, а оваа одлука ја потврди и Апелациониот суд. МВР по него распиша меѓународна потерница, но засега нема никаков траг каде е Кочан. Тој се товари за злоупотреба на службената положба како сопственик на „Трансмет“, кој со лажни документи добил тендер вреден 17 милиони евра од ЕЛЕМ.
Одбраната на Кочан тврди дека тој не е во бегство, туку е на службено патување. Вработените во фирмите на Кочан, „Трансмет“ и „Телевизијата Нова“, секој ден излегуваат на протести на различни локации и бараат слобода за газда Кочан. Пред неколку дена протестираа пред Апелациониот суд, потоа пред СЈО, а денеска пред зградата на ЕУ Инфо центар по повод посетата на еврокомесарот Јоханес Хас.
„Сеад не го даваме“ и „Слобода за Сеад“, извикуваа вработените од „Трансмет“ со цел да ги слушнат Хан, Вајгел, Кукан и Флекејнштајн кои денеска имаат средби со политичките лидери. Работниците неколку часа ја блокираа раскрсницата пред ЕУ Инфо центарот.