Дојдоа за фудбал, меѓусебно се истепаа и фудбал не видоа. Околу 1.500 полски навивачи имаа прилика да ја поздрават минималната победа (1:0) на нивната репрезентација над Македонија во квалификациите за Европското првенство во 2020 година. Но, дел од нив, поточно 223, наместо во секторот на источната трибина на арената „Тоше Проески“, заврши во неколку полициски станици низ Скопје.
Припадници на Министерството за внатрешни работи (МВР) на неколку часа пред почеток на натпреварот изолираа и приведоа 223 навивачи од Полска. Интервенцијата следуваше по физичката пресметка меѓу две групи на Полјаци во Паркот на Франкофонијата.
Поради големиот број на уапсени, во функција за нивни превоз беа ставени неколку стари автобуси на ЈСП, а сите го минаа денот и ноќта во полициските станици во Карпош, во Гази Баба, во Кисела Вода и во Ѓорче Петров. Претпладнево беа изведени пред судија за прекршоци по што ќе бидат познати и казните кои може да бидат парични, но да бидат изречени и времени мерки за влез во земјата.