Во црни ќеси за ѓубре во базата на МВР во „Брест“ во близина на селото Петровец биле уништувани документите за набавка на опремата за прислушување, потврдија на денешното рочиште за случајот „Тврдина 2“ двајца сведоци.
М.К.С. вработена како секретарка во Управата за безбедност и контраразузнавање на денешното рочиште за случајот „Тврдина 2“ беше сослушана како сведок. Таа негираше дека е виновна и рече дека била наместена.
„Се сретнав со една од колешките и таа ми рече дека ме бара друга колешка која исто така е обвинета во овој случај за да потпишам нешто. Кога отидовме во канцеларијата, ми рече да потпишам некои документи, затоа што тоа било работа на сите секретарки. Затоа потпишав. Не знаев што точно потпишувам, ниту пак дека сум била член на некаква си пописна комисија“, рече обвинетата М.К.С.
Таа појасни дека како секретарка на началникот В.Ц. и било речено кога ќе дојдат претставниците на пописната комисија да ги донесе црните ќеси во кои биле документите за ништење и на сите да им свари кафе.
По овој исказ на обвинетата реагираше обвинителот на Специјалното јавно обвинителство, Трајче Пеливанов, кој рече дека сега обвинетата во улога на сведок кажала дека ги видела документите во црните ќеси и дека кажала дека биле технички документи, како барање за годишен одмор, набавка на канцелариски материјали и слично. Пеливанов од обвинетата побара да каже кој исказ е точен, оној што го дала како сведок или пак она што сега го зборува пред судот.
Адвокатите на одбраната побараа записникот со исказот на обвинетата кој го дала како сведок да не влегува во доказите. Тие посочија дека обвинетата има право да се брани, а прашањето на обвинителот не е во согласност со законот за кривична постапка, бидејќи се што кажала во предистражна постапка не може да се употреби на главна расправа, бидејќи тогаш имала и својство на сведок.
Судот го одобри барањето на одбраната.
Претходно, сведок на СЈО, вработен во МВР, кажа дека обвинетиот Горан Грујевски лично му се јавил дека ќе дојде комисија да пали документи на денешното рочиште од судењето за палење 20 илјади списи – докази за масовното прислушување во Основниот суд Скопје 1. На ексначалникот на Петтата управа во МВР Грујевски му се суди во отсуство во случајот познат во јавноста како „Тврдина 2“, откако тој и Никола Бошкоски, вработен во УБК, избегаа за да не одат во притвор за случаите „Тврдина“ и „Таргет“.
Сведокот, кој работи во базата на МВР „Брест“, каде што обично се палат стари документи, патни налози и слично, рече дека бил присутен на палењето во 2015 година, но дека знаел за какви документи станува збор.
„Ми се јави лично началникот на Петтата управа во МВР, Горан Грујевски и ми кажа дека ќе дојде комисија да ништи документи. Не знаев дека постои таква комисија за ништење, но денот кога дојдоа бев на работното место. Јас сум старешина и морам да обезбедам влез и излез на сите што ќе дојдат. Дојдоа со комбе од комисијата. Подготвив еден канистер со вода и еден противпожатен апарат, по што почнаа да ги вадат вреќите од комбе. Со Никола Бошкоски разговарав во моите простории додека траеше палењето. Потоа си заминаа“, кажа сведокот.
Тој не можеше да се сети кога се случило точно палењето, само дека било 2015 година и било топло. За годината кажа дека знае бидејќи ќерка му правела свадба таа година.
Обвинетиот Горан Грујевски е во бегство веќе два месеца, откако Апелациониот суд Скопје му одреди притвор за други, потешки кривични дела.
Во бегство е и Никола Бошковски, осомничен во „Тврдина“ и „Таргет“, а сведок во случајот „Тврдина 2 “.
Поради дополнување на доказната постапка, судијката денешната главната расправа ја одложи за 2 ноември.
Во случајот Тврдина 2 во за уништување на службена документација поврзана со незаконското прислушување, обвинети се Горан Грујевски и уште шест вработени во УБК.