Забавно беше на прес-конференција на Рафаел Надал по мечот на Австралија опен по „загревањето“ во три сета на Шпанецот против Џејмс Дакворт. Вториот носител славеше со 6:4, 6:3, 7:5, а силното сонце во Мелбурн веројатно му удри во глава на 69 годишниот италијански новинар Убалдо Скањаната и го совлада дремка додека тенисерот од Мајорка ги сумираше впечатоците од воведниот настап на првиот гренслем во сезоната.
„Овде изгледа не е интересно денеска“, се пошегува Надал, откако го забележа новинарот како спие.
Смеењето во салата го разбуди Италијанецот кој му реплицира на шпанскиот тенисер.
„Долга и тешка ноќ“, возврати 69 годишниот новинар.
Надал во второто коло во Мелбурн ќе игра против уште еден Австралиец. Негов нареден ривал е Метју Ебден на стартот го елиминира Германецот Јан Ленард Штруф со 1:6, 6:3, 6:4, 6:4.