Демократската обвнова на Македонија (ДОМ) денеска јавно му се обрати на Државниот инспекторат за животна средина, со прашањето: Зошто дозволува Гази Баба да се труе веќе десетина дена со повеќе од 400 ПМ10 честички?
Од ДОМ истакнуваат дека градскиот инспекторат на терен утврдил дека најверојатен извор на загадување претставува стопански субјект во рамките на поранешна Железара, кој работи со А-интегрирана дозвола, а информацијата е јавно достапна со илустрација.
-Значи, инспекција во тој субјект може и треба да направи единствено Државниот инспекторат за животна средина. По утврдување на евентуален позитивен наод, мора да го спречи загадувањето и да изрече казна. Доколку не го направи тоа во најскоро време, ќе ја сметаме оваа институција за соодговорна за енормното загадување на Гази Баба последниве денови, а јавноста треба да дознае кој и кого го штити, на сметка на јавниот интерес и здравјето на граѓаните, се вели во соопштението од ДОМ.
Пред неколку дена заменик министерот за животна средина Јани Макрадули за Kанал 5 изјави дека неисправноста на апаратот покажал лажни вредности за квалитетот на воздухот во Гази Баба.
Сепак, Макрадули не исклучи дека има појава на палење на ѓубре на некои места во градот и затоа во некои делови на градот се чувствува миризба. Инспекторите веќе на терен ги проверувале сите пријавени места.