Извршниот комитет на УЕФА во Љубљана одбра градови домаќини за неколку клупски и репрезентативни натпреварувања во наредните години. Завршниот меч во Лигата на шампиони во 2021 година ќе се одигра во Санкт Петербург, во 2022 во Минхен, а во 2023 година на „Вембли“ во Лондон. Новиот континентален првак во тековното издание на елитното натпреварување ќе се одигра на 30 мај во 2020 година на стадионот „Ататурк“ во Истанбул.
Мечот за титулата во Лига Европа во 2021 година ќе се одигра во Севилја. Победникот, пак, за оваа сезона ќе биде промовиран на стадионот „Енерга“ во Гдањск.
Белфаст ја доби честа да биде домаќин на УЕФА Суперкупот во 2021 година, а организацијата на Европското првенство во футсал во 2022 година ` припадна на Холандија.
Познати се земјите домаќини на Европски првенства и во неколку младински категории во машка и во женска конкуренција. Изборот за ЕП 2021 (У17) падна на Кипар, а за ЕП 2022 (У17) на Израел.
Завршниот турнир на ЕП 2021 (У19) ќе се одигра во Романија додека довербата за организација на ЕП 2022 (У19) ја доби Словачка.
Фарски Острови ќе бидат домаќини на женското ЕП 2021 (У17) што една година подоцна ќе се одржи во БиХ. Европското првенство за фудбалерки до 19 години ќе се одржи во Белорусија во 2021 година, Чешка, пак, ќе ги нагости најдобрите селекции во истата возрасна категорија во 2022 година.