Донаторот на споменикот на Андон Јанев Ќосето, Здружението за духовно обединување на Сетинци-Попадинци и Крушоради, се уште нема пројавено интерес за да го подигне споменикот од Металскиот завод Тито, каде што го однесоа службите на град Скопје, кога на 22.февруари го тргнаа од пред Врховниот суд.
Споменикот е дело од контроверзниот проект „Скопје 2014“ на Владата на Никола Груевски, а беше поставен во времето на градоначалникот Коце Трајановски, како донација од Здружението за духовно обединување на Сетинци-Попадинци и Крушоради од Лерин.
Од град Скопје за НОВА велат, досега немало контакт од донаторот.
„Град Скопје ја отвори можноста споменикот да биде вратен на донаторот, но досега нема повратен контакт од фондацијата. Сериозноста на намерата е потврдена со испраќање на писмен допис до фондацијата. Доколку во наредниот период не се појави заинтересиран субјект, наредните чекори ќе бидат дополнително утврдени, за што јавноста ќе биде благовремено информирана“, велат од град Скопје.
Единствен кој пројави интерес за објектот познат во јавноста како „споменикот на Ќосето“ е Општина Сопиште, која планира да го постави на кружниот тек во село Сопиште, кој беше изграден при изградба на регионалниот пат кој го поврзува Сопиште со Сончев Град.
„Споменикот на Андон Ќосето нема да дозволиме да биде стопен. Тој гордо ќе биде поставен во општина Сопиште, а граѓаните на општина Сопиште ќе имаат спомен обележје од овој значаен историски лик. Ние како општина покажуваме, за разлика од други дека приоритет даваме на изградбата, а не на рушењето. Оваа иницијатива потегна од самите жители на општината, која преку денешната седница на Советот ја поднесоа советниците од редовите на ВМРО-ДПМНЕ“, изјави денеска Јане Мицевски, претседател на општинскиот совет.
Споменикот на Ќосето пред Врховниот суд стоеше приближно 4 години, а постаментот кој остана празен, наскоро треба да биде урнат, бидејќи град Скопје утврди дека се работи за дивоградба.
Доколку до средината на март, Здружението за духовно обединување на Сетинци-Попадинци и Крушоради не го побара споменикот, тој ќе остане во рацете на градската управа.
На местото пак, каде што беше поставен споменикот, градоначалникот на главниот град, Шилегов, најави дека ќе биде насадено дрво „за човекови права“ под кое ќе биде изгравиран Членот 10 од Општата повелба за човекови права на Обединетите нации.
Дрвото што ќе биде насадено на местото на постаментот ќе биде набавено од Нинберг и e од видот гинко.