Директорот на Фондот за здравство Ден Дончев во интервју за Фокус вели дека од паралелниот увоз на лекови најмногу ќариле фирми блиски до екс премиерот Никола Груевски.
-Три фирми што контролираат над 50 отсто од пазарот на паралелен увоз и се директно во кумска и роднинска релација со претходниот премиер Никола Груевски, вели Дончев.
Тој истакнува дека турската полиција уште пред две години предупредила за подземни капацитети во Турција што произведуваат лекови за македонскиот пазар. Тие се произведени од сомнителен извор, а спакувани во оригинални амбалажи, кои во Македонија доаѓаат преку т.н. паралелен увоз без каков било сертификат за квалитет затоа што законската одредба е укината во 2013 година.
ОЈО започна истрага за паралелниот увоз по истражувањето на НОВА
Со ова директорот на Фондот само ги потврди наводите од истражувањето за кои НОВА пишува веќе три месеца. Пред 10 дена од Обвинителството потврдија дека започнале истрага за наводите во истражувањето на НОВА токму за паралелниот увоз на лекови, по што Основното јавно обвинителство започнало истрага. Од ОЈО потенцираат дека започнале да го испитуваат случајот по допрен глас и во моментот се преземаат дејства за предистражна постапка.
“Започнато е да се испитуваат наводите и да се преземаат дејства за предистражна постапка, се читаат материјалите, се разгледуваат податоците, велат во ОЈО за НОВА.
Откако ќе се испитаат сите наводи, информации, податоци, но и искази од сведоци најверојатно Обвинителство ќе отвори истрага.
Што досега објави НОВА
НОВА објави дека во државата преку паралелен увоз на лекови во последните пет години влегуваат сомнителни лекови за кои не се знае како се транспортирани и чувани, немаат сертификат директно од производителите, туку се внесуваат од трети земји преку разни канали и веледрогерии.
Пред две недели и Народниот правобранител се заинтересира за случајот со паралелниот увоз со лекови за кој пишуваше НОВА и од таму потврдија дека се обратиле до Агенцијата за лекови(МАЛМЕД) при што побарале информации за потеклото на овие лекови, од каде доаѓаат, како влегуваат, како се транспортираат и чуваат.
Сомнеж дека 40 проценти од лековите кои влегуваат преку паралелен увоз првично изразија од Фармабренд Нова, асоцијација на претставници на странски производители на иновативни лекови. Таму потврдија дека имаат сознанија за повеќе случаи каде што биле пријавени нерегуларности кај лекови од паралелниот увоз забележани од пациенти, лекари и аптеки, но претходното раководство во Агенцијата за лекови не превземало никакви мерки за заштита на пациентите.
НОВА веќе објави дека се откриени случаи кога во пакување од еден лек има сосема друг лек со поинаков начин на дејство што го доведува во опасност животот на пациентот доколку не ја забележи грешката.
Имало случаи каде амбалажата на лековите била комплетно изгужвана и искината, а при проверка на лекот преку фармацевти од Турција било утврдено дека лековите се поврзани со имиња на турски пациенти и дека веќе биле наплатени во Фондот за здравство во Турција.
Шокантно е дека пред две години на тендер од Министерството за здравство, добил лек од паралелниот увоз произведен во Турција кој е забранет за употреба во многу земји во светот поради 40 евидентирани смртни слуачи. Лекот се користи за лекување на неколку видови на рак и бил наменет за болните од Клиниката за онкологија.
Паралелниот увоз на лекови го воведе претходната Влада во 2012 година со образложение дека на ваков начин ќе ја намали цената на лековите. Но, наместо од земји од ЕУ каде што има строги закони и критериуми за паралелен увоз, евтините лекови во Македонија најчесто се увезуваат од Турција или Русија.
Експертската јавност сега бара измени на законот за лекови во делот на паралелниот увоз со лекови со што ќе се гарантира сигурноста на лековите и безбедноста на граѓаните.