Дотур на прехранбени производи, медикаменти и останати потребни стоки на подрачјето на кое е прогласена кризна состојба (општините Дебар и Центар Жупа) ќе се врши секој ден во периодот од 8 до 14 часот, соопшти Министерството за внатрешни работи (МВР).
Оттаму посочуваат дека заради продолжување со работа на индустрискиот капацитет „Кнауф Радика“ Дебар, овозможен е безбеден проток на возилата со кои се врши транспорт на ресурси и стока во подрачјето каде што е прогласена кризна состојба.
„Возилата со кои се врши дотур на стока и возилата на компанијата „Кнауф“ се упатуваат кон безбедносниот пункт во правец на ХЕЦ „Шпиље“ и ХЕЦ „Глобочица“ или безбедносниот пункт преку Бошков Мост, од каде само со полициска придружба се упатува кон територијата на кризното подрачје“, информира МВР.
Истоварот на стоката, додаваат, ќе го вршат исклучиво лица кои се веќе во подрачјето за кое е прогласена кризна состојба, а на возачот на возилото или негов сопатник нема да му биде дозволено напуштање на возилото. По истовар на стоката, возилото со полициска придружба се враќа кон еден од безбедносните пунктови, каде по извршената дезинфекција му се дозволува слободно движење надвор од територијата на која е прогласена кризна состојба.
„Во интерес на зачувување на здравјето на граѓаните, сите граѓани задолжително да се придружуваат кон овие насоки за постапување“, апелираат од МВР.