Престројувањата во десницата предизвикаа „смена на дресовите“ и во медиумите блиски до политичките и бизнис структурите. Така, откако ВМРО-ДПМНЕ го погоди гром со политичкиот развод на Стевчо Јакимовски од Христијан Мицкоски, порталот Инфомакс кој е под контрола на „громовци“, сѐ почесто излегува со откритија на „валканите гаќи“ на довчерашните сојузници.
Така, Инфомакс во текстот со наслов во кој, практично, ја раскажаа приказната – „Kaтиљ ферман за медарите од ВМРО-ДПМНЕ: Како Мицкоски и неговите соработници испумпаа половина милион евра за адвокатски услуги од ЈП „Водовод и Канализација“ за неколку месеци?“ тие откриваат афера тешка половина милион евра. И тоа за само неколку месеци по заземањето на неколку локални јавни претпријатија.
Така, јавноста има можност да се запознае со зделките што јавните претпријатија, како „Водовод и канализација“ ги склучиле со адвокати. Во само две фактури, двајца адвокати испумпале 14.809.392 денари за неколку месеци од Јавното претпријатие „Водовод и Канализација“ во Скопје, а уште толку од другите јавни претпријатија во градот Скопје каде директори беа кадри на ВМРО-ДПМНЕ – пишува Инфомакс, кој објавува и табела со имиња и скенови од договори со адвокати, поврзани со вртоглави износи исплатени на адвокати.
Како што тоа обично бива, во текстот има и низа шпекулации и наводи од „извори блиски до редакцијата“, но во секо случај, доволно материјал за да се напише и бомбастичниот наслов.