Турскиот претседател Реџеп Таип Ердоган може да ја продолжи својата изборна кампања само во ограничен обем поради неговата болест, јави ДПА.
Тој одлучи да не се појави лично на денешната закажана инаугурација на мост во Адана, јужна Турција. Сепак, тој ќе присуствува преку телеконференција во живо од неговата канцеларија. Ердоган ретко ги пропушта инфраструктурните инаугурации каде што го промовира својот реизбор на 14 мај. Тој во средата го пропушти отворањето на линијата за брз воз што беше отворена во Анкара.
Ердоган водеше интензивна предизборна кампања и вообичаено се појавуваше по три пати дневно пред публика.
На 69-годишниот турски претседател му се слошило во вторникот вечерта, две недели пред парламентарните и претседателските избори. Тој прво мораше да прекине ТВ интервју во живо поради стомачни тегоби, по што направи пауза од кампањата.
Во четвртокот тој кусо се појави на видео-конференција со рускиот претседател Владимир Путин, на која турскиот претседател изгледаше бледо, пренесува ДПА. Министерот за здравство Фахретин Коџа изјави дека Ердоган има стомачни проблеми и оти треба да се одмори.
Неодамнешните анкети очекуваат тесна трка меѓу Ердоган и неговиот најсилен противкандидат, лидерот на опозицијата Кемал Киличдароглу.