Ургентното префрлување на рата за проекти и директна финансиска помош за независните филмски работници беше интервентно со цел да се помогне и одржи кревката македонска кинематографија во услови на светската пандемија на Ковид-19. Ова е заклучок од последното собрание на Друштво на филмските работници на Македонија (ДФРМ) за мерките донесени од Агенцијата за филм кои беа едногласно поздравени, имајќи во предвид дека работата на филм во изминатите шест месеци во државата беше во целосен застој.
„Собранието со индигнација ги отфрла и осудува неодамнешните написи во одредени медиуми, како и обвиненијата на поединци во врска со споменатите мерки. Политичките притисоци на тие поединци, каде се издвојува името на нашиот режисер Милчо Манчевски, претставуваат атак на домашната кинематографија, со единствена цел да се остварат лични интереси во време на предизборни активности на политичките партии. Ваквото однесување нè враќа кон времињата на едноумие и нетранспарентност. На тој начин се оставаше малку простор за афирмаија и работа на голем дел од филмската фела, посебно кај младите професионалци. Сметаме дека овој начин на функционирање треба да го оставиме зад нас, посебно во периодот кога македонската кинематографија има свој драматичен подем. Македонските филмови се дел од најпрестижните филмски фестивали и ја освојуваат светската публика преку филмските фестивали како „Санденс“, во Берлин, во Кан, па сè до огромниот успех на годинашната церемонија на американската Академија, каде нашата земја се закити со две номинации за Оскар“, се вели во реакцијата на ДФРМ.
Друштво на филмските работници на Македонија апелира до политичките партии и одредени медиуми, да не подлегнуваат на притисоци и манипулативни конструкции што ги лиферуваат поединци за сопствен бенефит.
„Сметаме дека треба јасно и недвосмислено да се искаже ставот дека македонската филмска фела е недозволиво да биде заложник на таквите интереси и со тоа да назадува националната кинематографија. Посакуваме заедно, посветено и транспарентно, да ги почитуваме пропишаните критериуми кои мора да важат за сите подеднакво и да продолжиме со афирмацијата на нашиот филм и култура во светот“, соопшти Друштвото на филмските работници на Македонија.