Ден по објавата на Специјалното јавно обвинителство, за отворање на истрага за случајот „Талир“ за незаконско финансирање на ВМРО-ДПМНЕ, Државниот завод за ревизија објави извештај за финансиското работење на оваа партија во 2015 година.
Ревизорите во извештајот многу повеќе цитираат закони, како треба политичките партии да го регулираат начинот на финансирање на партијата, а воопшто не обелоденуваат детали за евентуални незаконитости.
Па така, Државниот ревизор го посочува Законот за финансирање на политичките партии, според кој членарината претставува редовен износ на средства, кој членовите го плаќаат годишно согласно со актите на партијата, а кој за период од една година не смее да биде повисок од една просечна исплатена нето плата, поединечно по секој член.
„Ревизијата констатира дека партиите приходите од членарина најчесто ги регулираат со донесување на интерен акт. Заради воедначено постапување кај сите политички субјекти ревизијата смета дека надлежните органи потребно е да донесат поконкретни насоки за регулирање на начинот на плаќање, уплата, евидентирање, со цел еднообразност во начинот на сметководствено евидентирање и потврдување на законски утврдениот лимит за секој член одделно“, пишува во извештајот на ревизорот.
Токму начинот на кој се уплатувани донациите е предмет на најновата истрага на СЈО, за незаконско финансирање на ВМРО-ДПМНЕ и перење на пари под кодно име „Талир“.
Според доказите на СЈО, Груевски како првоосомничен создал криминална група со помош на која незаконски стекнати пари ги внесувала во партијата како донации од физички лица. На таков начин дури 5 милиони евра биле уплатени на жиро сметката на ВМРО-ДПМНЕ, а потоа со нив бил купуван недвижен имот, пасишта, ниви или вкупно СЈО нашло докази за договори за 78 недвижен имот. Истрагата се однесува за незаконско финансирање на партијата во периодот од 2009 до крајот на 2015 година.
„Мотивите на првоосомничениот биле исклучиво од лична природа и биле поврзани со зацврстување на неговата политичка моќ и позиција во партијата и во државата и во обезбедување на целосна контрола над политичката партија“, рече обвинителката Фатиме Фетаи.
Помеѓу 14-те осомничени за случајот „Талир“, освен претседателот на ВМРО-ДПМНЕ Никола Груевски, се наоѓаат и повеќе високи функционери од партијата од кои најголем број се членови на Извршниот комитет.
Според ревизорскиот извештај, во 2015 година ВМРО-ДПМНЕ прикажала приходи од 2 милиони и 400 илјади евра од камати, донации, подароци, а дел од парите се пренесени од претходната година. Расходи пак, за истата година партијата на Груевски имала 2 милиони и 370 илјади евра.
Токму за оваа 2015 година НОВА ТВ ги истражуваше донациите во кои откривме дека администрацијата донирала 1.5 милиони евра, а во еден ден на сметката на партијата донирале и над 700 граѓани.