Пет лица меѓу кои и државниот секретар во Министерството за внатрешни работи (МВР), Магдалена Несторовска одат во самоизолација во домашни услови во рок од 14 дена, а останатите 62 анкетирани лица се враќаат на работно место со почитување на мерките, откако вчера беше утврдено дека двајца вработени во бифето на првата зграда во кругот на МВР се позитивни на коронавирус.
Од МВР информираат дека во текот на вчерашниот ден, епидемиолошки тим од Институтот за јавно здравје (ИЈЗ), а врз основа на доставен список на сите вработени кои имале контакт со двајцата вработени, направена е епидемиолошка анкета на 67 лица, а воедно и дезинфекција на сите работни простории во зградата.
„Во извештајот од епидемиолошкиот тим што го добивме денеска е утврдено средно ниво на ризик кај анкетираните, меѓу кои и кај државниот секретар Магдалена Несторовска. Петте лица одат во самоизолација во домашни услови во рок од 14 дена од последниот контакт со лице позитивно на Ковид-19. За останатите 62 анкетирани лица кои се проценети со низок ризик се препорачува задолжително носење на заштитна маска за целото време на работниот процес. Истите може да се вратат на работно место“, стои во соопштението од МВР.
Министерството за внатрешни работи апелира до сите вработени за правилна и постојана употреба на лична заштитна опрема, одржување на соодветно растојание, често миење и дезинфекција на раце. Во канцелариите каде се сместени вработените, постојано да се врши проверување на просториите, а вработените задолжително да носат лична заштитна опрема додека се на работното место.