Ставот на ДУИ во врска со изборите е дека треба да се исполнат два критериума за нивно одржување – првиот е Комисијата за заразни болести да каже дека таков процес нема да го загрози здравјето на граѓаните, а вториот е ОБСЕ/ОДИХР да констатира дека можат да го следат процесот, изјави вицепремиерот за европски прашања Бујар Османи на денешната прес-конференција.
Тој потенцира дека вториот услов бил споменат и во вчерашната комуникација со телата на Европската Унија кои, како што додаде, „сметаат дека одлуката за избори е наша, меѓутоа е многу важно да има набљудувачи од ОБСЕ/ОДИХР во изборниот процес“.
„Ако овие два услови се исполнат, ние сме на став дека изборите може било кога да се одржат“, рече Османи.
Според него, за да се одржат изборите, треба да се направи анализа врз основа на постоечките параметри, врз основа на еден тренд.
„Затоа на пример, мерките на олеснување не ги даваме денеска, ги планираме во петок, за да имаме една недела тренд. Кога ќе треба да се донесе одлуката за избори, Комисијата треба стручно да го види трендот, бидејќи трендот ја покажува проекцијата за наредниот период, какви ќе бидат наредните десет или дваесет дена“, оцени вицепремиерот Османи.