Фактот што не е дел од Лигата на шампиони се одрази и на финансиското работење на Манчестер јунајтед. Ревизијата за првиот квартал во оваа година покажува пад на вкупните приходи за 2,8 отсто или 3,4 милиони фунти, а клубот бележи драстично намалување на средтсвата од продажба на влезни билети за дури 32,3 отсто или 16,8 милиони фунти. На падот на приходите се одразија и трите меча помалку што „црвените ѓаволи“ ги одиграа на домашен терен за разлика од истиот период лани.
Паралелно со тоа, нарасна долгот за 18 отсто или 337 милиони фунти што во најголем дел е последица на падот на вредноста на фунтата во однос на доларот по референдумот за Брегзит. Ед Вудворд, извршен директор на Манчестер јунајтед, признава потешкотии во работењето на клубот и истовремено изрази верба дека ќе бидат краткорочни.
„Нашите финансиски резултати се послаби во однос на минатата година што воглавно е последица на неиграњето во Лигата на шампиони“, истакна Вудворд.
Манчестер јунајтед потроши големи средства за засилувања во летниот период. Меѓу другите ги ангажира Златан Ибрахимовиќ и, особено, Пол Погба со рекорден трансфер во историјата на фудбалската игра. Екипата моментно е шеста во Премиерлигата, игра четвртфинале во Лига купот и се наоѓа на третото место во групата во Лига Европа и крајно неизвесно е дали ќе успее да обезбееди место во нокаут фазата.