Министерот за животна средина и просторно планирање Садула Дураки и заменик министерот Јани Макрадули денеска ќе одржат состанок за координирање и усогласување на активностите за намалување на загадувањето на амбиенталниот воздух со градоначалникот на Скопје и градоначалниците на општините од Скопскиот плански регион.
На состанокот, како што информираат од Министерството за животна средина и просторно планирање, ќе бидат презентирани моменталната состојба, законските ингеренции, актуелните планови, досегашните искуства и проблеми, како и предлог мерките и патоказите за дефинирање на идна комуникација и делување да имаат МЖСПП, УНДП, Државниот инспекторат за животна средина и Инспекцискиот совет.
На средбата, како што е најавено, ќе присуствуваат и постојниот претставник на УНДП во Македонија Луиза Винтон и градоначалникот на Скопје, Петре Шилегов.
Се греат на гуми, пластика, масло од возила
Заменик министер за животна средина, Јани Макрадули вели дека и во центарот на Скопје има семејства кои се греат на јаглен. Според него греењето во домаќинствата учествува со 62 отсто во загадувањето на воздухот. Тие го користат маслото од возилата за поефективно да се загреат, пластика и гуми.
Макрадули смета дека е потребна координирана акција во која локалната самоуправа со бизнис заедницата, невладините организации, во широк фронт ќе дојдат до решение за загадувањето.
Во Министерството за животна средина има сериозна екипа која работи на проблематиката.
– За првпат во буџетот ќе има посебна ставка за загадувањето. 3,5 милиони евра за борба со загадувањето – вели Макрадули.
Според него, загадувањето мора да се решава во повеќе сектори, затоа што тоа не било само работа на Министерството за животна средина, па мора да се вклучат и Министерството за транспорт и врски и други.
Макрадули утре ќе има средба со градоначалниците од скопските општини. Тој вели дека една мерка која може да биде поволна за една општина, може да биде штетна за друга и затоа е потребна координација меѓу општините. Тоа што општина Аеродром е на пониска надморска височина од општина Ѓорче Петров, го наведе како пример.
Макрадули смета дека дел од парите од акцизата за дизел ќе се вратат во намалувањето на загадувањето.
Тројца инспектори во Скопје
Четиринаесет инспектори се задолжени за контрола на ниво на цела држава. Во Скопје се само тројца, од кои двајца пред пензионирање. Со надминувањето на дозвлените концентрации на опасните ПМ честички во воздухот, на површина испливаа речиси сите проблеми на инспекторатот. Ако граѓаните се гушат во смог, државниот инспекторат за животна средина се гуши во долгови. До вчера имал блокирана сметка. Една од небулозите е тоа што пари нема за гориво и одржување на возилата со кои инспекторите одат на терен, а плаќа околу 700тини евра месечно за интернет.
-Инспекторите сега кога одат на терен поради немање на буџет, не можат со нив да носат лабораторија, каде што ќе се земе примерок и ќе биде испитан. Потребата постои, во наредниот период ќе работиме на тоа државната лабораторија да биде сертифицирана и да биде достапна на сите нас – вели Мирослав Богдановски, в.д. директор на Државниот инспекторат за животна средина.