Вардар го прокнижи четвртиот пораз во групата во ракометната Лига на шампиони. „Црвено-црните“ во СЦ „Јане Сандански“ загубија од Веспрем со 27:29 во дербито во групата А и мечот на неделата на ЕХФ и паднаа на третото место на табелата во пресрет на последните две кола.
Македонскиот шампион одигра две различни полувремиња пред своите навивачи. Одлично прво по кое, благодарение на 11. интервенции на Дејан Милосављев и ефикасноста во нападот, замина на одмор со пет гола разлика (16:11).
Но, главен збор во второто имаше унгарскиот состав за заслужена победа на крајот. Набрзина направија серија од 6:1 за израмнување на 17:17 по што следуваа уште две мини серии (4:1 и 3:1) за осигурување на бодовите во Скопје.
Мате Лекаи беше најефикасен на средбата со седум гола, шест за Веспрем додаде Ласло Наѓи, Дејан Манасков додаде два додека Арпад Штербик заврши со скромни за него шест одбрани. Листата на стрелци кај Вардар ја предводеше Кристијан Дизингер со пет погодоци, по четири реализираа Стојанче Стоилов, Даинис Кристопанс и Сташ Скубе.
Наредниот викенд Вардар ќе патува на мегдан на Крстијанштад во Шведска, а до крајот на групната фаза го очекува и дуел со Монпелје во Скопје.