Централно-европскиот универзитет (ЦЕУ) во Будимпшта ќе добие уште една година рок за да се прилагоди на новиот контроверзен унгарски закон за високо образование.

Критичарите на овој закон велат дека тој е донесен за да може унгарската влада на Виктор Орбан да го затвори овој универзитет финансиран од милијардерот Џорџ Сорос.

Според новиот унгарски закон, ЦЕУ, за да може да постои во Унгарија, мора да има свој центар и во матичната земја. Во овој случај тоа би биле САД бидејќи Сорос е американски државјанин.

Ова правило важи за сите 28 странски унверзитети во Унгарија а ЦЕУ е единствен што не го исполнува овој услов. Унгарската влада одлучи рокот за исполнување на условот да го продолжи до јануари 2019 година.

Унгарија и ЦЕУ влегоа во преговори ова лето со цел да се најде договор.

ЦЕУ, кој важи за еден од најдобрите европски високо-школски установи, беше основан во 1991 година по падот на комунизмот со цел да промовира добро владеење, траен развој и социјални реформи. На ЦЕУ има студенти од 117 земји а голем дел доаѓаат од балканските и источно-европските земји.

Најавите на унгарската влада за нов закон што е закана за постоењето на ЦЕУ предизвикаа бран поддршка за ЦЕУ низ цела Европа.