Очекуваме брза, транспарентна и веродостојна истрага за наводите за прекумерна употреба на сила, како и правична постапка за сите приведени, рече Мерсие.
Европската комисија соопшти дека внимателно го следи развојот на ситуацијата во Србија, каде што се евидентирани случаи на употреба на сила против демонстрантите, масовни апсења и обвинувања против студенти за наводно организирање обид за државен удар.
Внимателно ја следиме ситуацијата. Остро го осудуваме секој чин на омраза и насилство. Правото на мирно собирање мора да биде заштитено, изјави портпаролот на Европската комисија, Гијом Мерсие.
На прашањето дали најновите дејствија на српските државни институции се во согласност со правилата и вредностите на Европската унија, портпаролот на Комисијата не одговори директно, но потсети на основните европски принципи.
Интервенцијата на полицијата мора да биде пропорционална и во согласност со основните права, вклучително и правата на сите уапсени. Очекуваме брза, транспарентна и веродостојна истрага за наводите за прекумерна употреба на сила, како и правична постапка за сите приведени, рече Мерсие.
Тој потсети дека „фундаменталните вредности се јадрото на нашиот заеднички европски проект и мора да се почитуваат. Ова, меѓу другото, се однесува и на слободата на собир како фундаментално право“.
Европската комисија претходно ги повика властите во Србија да ги почитуваат основните права и стандарди што се дел од процесот на европска интеграција.
Додека Белград тврди дека е посветен на европскиот пат, од Брисел доаѓаат пораки дека вредностите на Европската Унија мора да се потврдат во пракса.