Авионот што се урна во Колумбија и во смрт однесе 71 лице бил сопственост на поранешен левичарски политичар и бизнимен од Венецуела, а оператор била авиокомпанија од Боливија што била специјализирана за превоз на фудбалски екипи, пишува агенцијата „Ројтерс“. Леталото на „Ламија“ што во понеделникот вечер се падна на планина во близина на Меделин ги превезуваше фудбалерите на бразилскиот прволигаш Шапекоенсе кои вечерва требаше да играат против домашниот Атлетико Насионал во финалето на Копа Судамерикана. Меѓу настраданите во стравичната несреќа што ги шокира љубителите на фудбалот, клубовите и колегите ширум светот беа 19 играчи на клубот. Тројца од фудбалската експедиција го преживеаја падот на авионот.
Неколку денови претходно, истата компанија беше избрана за превозник и на репрезентацијата на Аргентина во Бразил во квалификациите за СП 2018, а со нејзин авион леташе и селекцијата на Венецуела во Колумбија.
„Се обидуваме да дојдеме при себе. Оваа трагедија силно нè погоди. Многу летови имаме зад нас, авионот беше оперативен во целост, со нормални параметри и со соодветни инспекции и контроли“, изјави Густаво Варгас, пензиониран генерал на военото воздухопловство.
Според копилот на друг авион во подрачјето на кое се случи несреќата, пилотот на „Ламија“ пријавил дека снемува гориво и дека мора итно да слета.
Авионот со фудбалери и новинари на споменатата авиокомпанија бил единствен исправен од трите со кои оперирала. Станува збор за производ од типот „БА2 146“ или „Аероспејс 146“ на производителот „БАЕ Системс ПЛЦ“ и во сопственост на Рикардо Албасете. Екипата на Шапекоенсе пристигнала со комерцијален лет од Сао Паоло во Боливија каде ја чекал чартерот.
Албасете ја основал компанијата „Ламија“ во Венецуела во 2010 година на која никогаш не ѝ била издадена дозвола за летање, тврди Канцеларијата за цивилно воздухопловство во земјата не објаснувајќи ги притоа причините. Потоа Албасете ги изнајмил трите авиона на посебна компанија „Ламија Боливија“ која од боливиското цивилно воздухопловство добила дозвола за летање во јануари во 2016 година. Компанијата е во сопственост на Мигел Квирога, пилот кој, исто така, го загуби животот во кобниот лет и на Марко Роче, поранешен капетан на оружените сили.