За ископ на јаглен и јаловина од надворешно ангажирани фирми и изнајмување на механизација за РЕК Битола и РЕК Осломеј, во периодот од 2012 до август 2017 година, платени се 212 милиони евра, информираше денеска на прес-конференција генералниот директор на ЕЛЕМ.
Тој рече дека за ископ на јаглен и јаловина платени се 161 милион евра, а за надворешна механизација биле платени 46 милиони евра.
Миновски рече дека за ископ на јаглен во РЕК Битола биле ангажирани само пет компании, „Трансмет“, „Силекс неметали“. „Пелистер“, „Гранит“ и „Марковски Компани“. Тој додаде дека во одредени периоди, овие фирми на тендерите учествувале самостојно, а во други случаи учествувале како конзорциум.
„Овие трошоци кои ги наведов влијаат врз цената на електричната енергија. Вкупните трошоци за ископ на јаглен и јаловина од надворешни фирми и ангажирањето на помошна механизација, исто така од надворешни фирми, влијаат на регулираната цена на електрична енергија во просек за изминатите години од 2012 до август 2017 година, со околу 20% или во просек по 8 евра за секој произведен MWh (во моментов регулираната цена за производство на електрична енергија од АД ЕЛЕМ изнесува 41 €/MWh)“, рече Миновски.
Тој додаде дека во однос на ангажирањето на надворешна механизација , намерата на ЕЛЕМ е во многу брзо време да набави сопствена механизација, што ќе доведе до намалување на трошоците за користење на механизација од надвор.
Инаку поранешните управители на „Трансмет“ и „Силекс неметали“ се обвинети во случајот „Труст“ на СЈО. Тие се сомничат дека со фалсификувани документи добиле тендер од 17 милиони и 200 илјади евра од ЕЛЕМ за ископ на јаглен и јаловина од рудникот Суводол. Овие две фирми заедно со фирмата „Вато“ Дооел настапиле како конзорциум во еден од тендерите на ЕЛЕМ.