Марио Драги денес поднесе оставка како италијански премиер, внесувајќи ја земјата во повеќемесечни превирања и ослабувајќи го лидерството на Европа во критичен момент.
Кабинетот на претседателот Серџо Матарела ја објави веста откако двајцата се сретнаа во претседателската палата. Одлуката на Драги да поднесе оставка дојде откако тој не ја доби поддршката од неговите коалициски партнери при гласањето за доверба во парламентот. Сега се очекува да се одржат предвремени избори наесен.
Во емотивните сцени во парламентот денеска, Драги изјави пред Долниот дом дека ќе поднесе оставка. Тој беше дочекан со долг аплауз од некои во комората, кои станаа на нозе. „Благодарам“, рече тој како одговор. „Дури и централните банкари имаат срце“.
Заминувањето на 74-годишниот Драги, поранешен претседател на Европската централна банка, ја лишува Италија од авторитетен лидер на прагот на невидена енергетска и животна криза и со војна на прагот на Европа.
Тоа ја означува кулминацијата на неколкунеделните тензии во италијанската разединета коалиција, која Драги се обиде да ја води како влада на национално единство. Откако минатата недела ја загуби поддршката од популистичкото Движење 5 ѕвезди, вчера премиерот ја загуби поддршката од десничарските партии во неговиот сојуз – Форца Италија на Силвио Берлускони и Лигата на Матео Салвини.
Фаворит за преземање на премиерската функција ќе биде Џорџија Мелони, лидерка на партијата „Браќа на Италија“, која ја поздрави можноста за нови избори. „Со оставката на Драги, овој законодавен дом заврши за Браќата на Италија“, напиша таа на Твитер. „Ние ќе се бориме да му го вратиме на италијанскиот народ она што го имаат граѓаните на сите други демократии: слободата да изберат кој ќе ги застапува“.
Повлекувањето на премиерот Марио Драги ја остава ЕУ без еден од нејзините најискусни лидери и експертски гигант на европската економија во многу тешко време за блокот.
Колапсот на коалицијата на Драги, исто така, ќе го искомплицира донесувањето на одлуките на Европската централна банка, од која се очекува денес да објави зголемување на стапката и нова „алатка“ дизајнирана да го стабилизира државниот долг на еврозоната.
Со војната и енергетската криза кои ги зголемуваат стравувањата од европска рецесија, отсуството на експертизата на Драги во ЕУ, исто така, ќе биде удар за лидерството на Унијата, токму кога тоа е најпотребно. (Р.Н.)