Селекторот на македонската ракометна репрезентација Раул Гонзалез по синоќешниот пораз од Шпанија на Европското првенство во Хрватска, изјави дека многу е голема веројатноста дека до крајот на шампионатот го загуби капитенот Кирил Лазаров.

– Цел натпревар одигравме катастрофално. Лошо почнавме и уште по 15 минути губевме седум разлика. Лазаров рано се повреди и мислам дека нема да може да игра до крајот. Нашите шанси без него се многу помали. Кире за нас е многу важен. Ќе видиме како без него, рече македонскиот селектор.

Лазаров го напушти натпреварот во 12.минута поради повреда на десната задна ложа.

Македонија во вторник во 2.коло од втората фаза игра со Чешка.

Прв пораз, но има шанси

Тежок пораз на македонските ракометари на Европско првенство во Хрватска. Шпанија ги разби „црвено-жолтите“ со убедливи 31:20 (15:6) во првиот настап во новоформираната група 2 и ги спушти на четвртата позиција на табелата. Резултатскиот и играчки дебакл можеби доаѓа во вистински момент за националниот тим пред двата преостанати дуела во Вараждин чиј влог е полуфинале на континенталнуиот турнир.

Борко Ристовски беше единствена светла точка на почетокот на судирот со „фуријата“. Неколкупати успеа да ја сочува сопствената мрежа, но недоволно ниту за достоинствено парирање во мечот со фаворитот од Пиринеите. Одбраната беше лесно пробојна додека нападот блед и анемичен и тешко доаѓаше до позиција за удар, но и често се грешеше. Шпанците, пак, не губеа многу време да казнуваат од полуконтри или контри или, подобро речено, да користат секаков подарок за демонстрација на сила, моќ и амбиција за највисок пласман.

Селекторот Раул Гонзалес не можеше да смета на средниот бек Филип Миркуловски, а „удар“ плус доби со повредата  Лазаров. А, мечот дотогаш, резултатски и играчки, беше тргнат во непосакуван правец од кој немаше враќање.

Се што следуваше во продолжение на средбата беше рутинско одработување на Шпанците додека македонските репрезентативци и навивачите имаа, се чини, само една мисла во главите. Што побрзо да изминат 60. минути за насочување кон Чешка, наредниот противник што ги очекува „црвено-жолтите“ во вторник од 18,15 часот. Загубената позиција против „фуријата“ значи и чување на силите за она што претстои како голема веројатност за добивање.

Фигерас, Сораиндо и Соле беше триото што ја предводеше Шпанија против Македонија. Сите постигнаа по пет гола, Стојанче Стоилов и Дејан Манасков реализираа по четири за „црвено-жолтите“.

ЕП во ракомет

Група 2 (Вараждин), 4 коло

Македонија – Шпанија 20:31

Германија – Данска 25:26

Табела: Данска 6, Шпанија 4 (-1), Германија 4, Македонија 3 (-1), Чешка 2 (-1), Словенија 1 (-1).

Идно коло: Словенија – Шпанија (вторник, 18,15 ч.), Македонија – Чешка (вторник, 20,30 ч.).

Понеделник на ЕП

Група 1 (Загреб), 5 коло

Србија – Франција (18.15 ч.)

Шведска – Белорусија (20.30 ч.)

Табела: Франција 6 (-1), Хрватска 6, Норвешка 4, Шведска 4 (-1), Белорусија 0 (-1), Србија 0 (-1).