Грција и Италија го комплетираа саботниот квартет четвртфиналисти на 40. Европско првенство во кошарка. Претходно меѓу осумт најдобри се пласираа Словенија и Германија по победите над Украина, односно, Франција.
Грците во последното осминафинале вечерва во Истанбул ја совладаа Литванија со 77:64 (по четвртини: 25:17, 12:13, 24:18, 16:16). Селекцијата на јужниот сосед водеше во целиот натпревар, а во еден момент имаше и плус 16. Литванците успеаја во завршните десет минути да се доближат на четири поени разлика, но поблиску од тоа не можеа.
Најефикасен во победничката репрезентација беше Костас Слукас со 21 поен, еден помалку од него постигна првиот литвански стрелец Миндаугас Кузминскас. Грција во четврт-финалето ќе игра со победникот од дуелот меѓу Русија и Хрватска.
Италија, претходно, ја надигра Финска со 70:57 (по четвртини: 30:17, 18:12, 10:13, 12:15). „Азурите“ беспрекорно го почнаа мечот и на крилјата на Луиџи Датоме стекнаа убедлива предност по воведните десет минути. Работата потоа ја презедоа Марко Белинели, Николо Мели и Даниел Хакет и благодарение на одличниот шут ја одржуваа предноста до крај.
Белинели со 22 коша, Датоме со 15 и Хакет и Мели по десет беа италијански предводници до четвртфинале. Лаури Марканен овојпат беше тотално неутрализиран, па Петери Копонен со 13 поени и Сасу Салин со 11 беа најзабележителни поединци во тимот на Хенрик Дитман.
ЕП 2017 во кошарка – осминафинале
Словенија – Украина 79:55
Германија – Франција 84:81
Финска – Италија 57:70
Литванија – Грција 64:77
Недела
Летонија – Црна Гора (11,30 ч.)
Србија – Унгарија (14,15 ч.)
Шпанија – Турција (17,45 ч.)
Хрватска – Русија (20,30 ч.)