Турскиот претседател Реџеп Таип Ердоган има намера за време на претстојната посета на Русија да разговара за деталите за купување на вториот полк на противвоздушни ракетни системи С-400. Тој ова го објави пред новинарите во авион, враќајќи се од Црна Гора, пренесува турскиот канал НТВ.
-Не се сомневаме дека ќе купиме втор полк (С-400) од Русија. Покрај С-400, ние и Русија имаме многу иницијативи во одбраната и другите области. Значи, постојат различни алтернативи. На пример, ги користевме нивните авиони. Б-200 за гаснење пожар. Разговаравме за ова (со рускиот претседател Владимир Путин) по телефон, рече Ердоган.
Турскиот претседател не го прецизираше датумот на планираната посета на Руската Федерација, а последниот телефонски разговор меѓу лидерите на двете земји беше остварен на 21 август.
Само два дена подоцна генералниот директор на рускиот државен извозник на оружје „Рособоронекспорт“, Александар Микејев откри дека Русија и Турција наскоро би можеле да потпишат нов договор за испорака на рускиот противракетен систем С–400.
– Консултациите продолжуваат и се во завршна фаза. Наскоро ќе го официјализираме договорот со нашите партнери, рече Микејев.
Како што пренесе агенцијата ТАСС, Микејев кажал дека се постигнати одредени успеси на Меѓународниот саем за одбранбена индустрија што се одржа во Турција на почетокот на август.
Во 2017 година, Москва и Анкара потпишаа договор за испорака на рускиот противракетен систем на Турција, со што Турција стана првата членка на НАТО што го купи овој ракетен систем од Русија.
Одлуката на Анкара да купи систем од руско производство предизвика негодување кај САД и НАТО, а Вашингтон досега не се откажа од напорите да ја принуди Турција да се откаже од рускиот противракетен систем.