Турските судови објавија потерница за апсење на Фетула Ѓулен, религиозниот лидер кој живее во САД, а кој владата на Реџеп Таип Ердоган го обвини за организатор на неуспешниот воен удар кој се случи во Турција на 15.јули, во кој над 270 луѓе загинаа.
Според владата, Ѓулен, кој живее во Пенсилванија, бил организатор и главен на војниците кои го извршија ударот и бара од американската влада да биде екстрадиран во Турција.
Ѓулен пак, смета дека потерницата е дело на некогашниот негов близок соработник, претседателот Ердоган, кој се стремел кон авторитаризам.
– Познато е дека турскиот судски систем нема независност и оваа потерница е само уште еден пример за желбата на претседателот Ердоган да ја тргне демократијата и да воспостави авторитарен режим, изјави Ѓулен.
Турција до сега нема доставено официјално барање до американските власти за екстрадиција но се смета дека издавањето на потерницата е првиот чекор кон таквата постапка.
Од своја страна, САД пак бара документирани докази од Турција за вмешаноста на Ѓулен во пучот за да го екстрадираат на Ердоган.