Генералниот директор на ЕСМ Васко Ковачевски одржа брифинг со новинарите со најнови информации од работењето на компанијата и енергетските случувања во државата. Тој рече дека се прават максимални напори од сите енергетски чинители и институции за да не дојде до покачување на цената на електричната енергија од 1 јануари.
Производството на електрична енергија е стабилно и во пораст, вели, и се намалува набавката на енергија. Во моментов ЕСМ работи со сите капацитети во полн погон, освен блок 3 во РЕК Битола, за каде се очекува носечката единица од трансформаторот, и каде се инсталирани сите други делови во очекување за брзо стартување на блокот.
Набавен е јаглен од 600.00 тони за РЕК Битола, а привршува постапката за обезбедување јаглен и за РЕК Осломеј. ТЕЦ Неготино работи со два котли и планирано е да произведува со максимален капацитет до 30 април. Мазут за работа на термоелектраната е обезбеден за до крајот на грејната сезона.
ЕСМ Продажба денеска почна постапка за набавка на природен гас за потребите на топланите за греење на градот Скопје за периодот јануари-април. Договор се очекува до крајот на декември.
Во однос на парното греење во градот Скопје, директорот Ковачевски информираше дека компаниите кои го работат делот на производство и снабдување со топлина целосно ги презедоа своите ингеренции во однос на испораката на топлинска енергија, воспоставен е нов систем на креирање сметки, сметките се испорачуваат и од следниот месец ќе почне изедначување за испорака на сметките во вообичаениот термин во месецот. Набрзо ќе се овозможи онлајн плаќање, за што привршува инсталирањето на софтверот.