ЦСКА Москва убедлива во салата „Абди Ипекчи“ со 109:84 во меч на стартот на сезоната што падна во сенка на навивачкиот неред во финишот на првиор дел
Прекин предизвикан од нереди на навивачи кои фрлаа запалки на теренот во „Абди Ипекчи“ во Истанбул ја ставија во сенка убедливата победа на ЦСКА Москва над Галатасарај со 109:84 на стартот од новата сезона во кошаркарската Евролига. Инцидентот се случи во последната минута од првото полувреме и дојде како последица на судиска одлука за техничка грешка на Ергин Атаман, тренер на домашната екипа, и на Џастин Детмон.
Синан Гулен, како капитен на Галатасарај, го искористи своето реноме кај навивачите и како најприсебен во ситуација побара да престанат со фрлање на тврди предмети на паркетот. По кус прекин, страстите, за среќа, се смирија и натпреварот продолжи.
Највпечатлив на теренот беше Милош Теодосиќ. Српскиот репрезентативец забележа дабл-дабл ефект (20 коша, 11 асистенции), Нандо де Коло постигна 22, Арон Џексон заврши со 16 поени колку што реализира и Гулен, централна фигура кај поразената екипа.
Црвена звезда предмалку во Белград загуби од Дарушафака со 70:73, а во последната денешна средба Армани во Милано, во неизвесен финиш, славеше против Макаби Тел Авив со 99:97.
Во синоќешната премиера Реал Мадрид трумфира над Олимпијакос со 83:65. Утревечер се преостанатите четири дуели од првото коло во кои ќе играат Уникс Казан – Барселона, Фенербахче – Бросе Бамберг, Панатинаикос – Жалгирис и Виторија – Ефес Пилсен.