Во полициска акција против шверцери на бегалци, во која беа вклучени полициите на Шпанија и на Албанија и надлежните безбедносни служби на Австрија, на Франција, на Италија, на Словенија, на Португалија, на В. Британија, на САД, на Косово и Европол, се уапсени вкупно 46 лица кои се дел од криминална мрежа што овозможувала на бегалците илегално да влегуваат во Британија и САД.
– Истрагата, предводена од шпанската полиција со меѓународна полициска поддршка и соработка, резултираше со разбивање на организираната криминална група вклучена во трговија со луѓе и изработка на лажни лични документи и патни исправи, соопшти Европол.
Како што е наведено, билансот на полициската акција е: 46 уапсени, два претреса во куќи, заплена на фалсификувани лични документи, финансиски документи, електронска опрема, пари и разни наркотици.
Истрагата е започната во 2019 година поради голем број фалсификувани лични документи на бегалци од Западен Балкан. Акцијата беше координирана од Европол, обезбедувајќи размена на доверливи информации и аналитичка и форензичка поддршка.