Новиот вардаров тренер Хозе Писонеро го крои ростерот за одбрана на тројната круна од изминатата сезона. Европскиот ракометен шампион е на шопинг во Бундеслигата од каде во Скопје привлече еден летонски репрезентативец и двајца руски. По официјализирање на трансферот на голманот Кугис Артурс, сонародник на Даинис Кристопанс, кој доаѓа од Гросвалштад како замена за Дејан Милосављев, од таборот на „црвено-црните“ денеска уште две потврдени принови.
Нов партнер на Стојанче Стоилов на позицијата кружен напаѓач, по заминувањето на Рожерио Мораеш, е Сергеј Горпишин (21). Роден е во Германија, има 21 година и меѓу вардарци ќе пристигне од Ерланген. Карииеата ја започна во Ајнтрахт Хилдесхајм, а две сезони мина и во екипата на Спринге. Беше дел од репрезентацијата на Русија на годинашното Светско првенство во Германија, остана во националниот тим и во квалификациите за Европското првенство во 2020 година. Син е на Вјачеслав Горпишин кој со „зборнаја“ освои злато на Олимписките игри во Сиднеј во 2000 година.
Заедно со него во СЦ „Јане Сандански“ е најавен и Павел Атман (32), добро познато име на македонската ракометна јавност со оглед на неговиот стаж во минатото во дресот на Металург. Игра на бековските позиции (лев и среден бек) и во изминатите две сезони настапуваше за Хановер. Претходно (2015-2017) играше за Мешков Брест по кратките авантури во Ал Ахли и во Ел Џаиш. Во суперлигашот од Автокоманда се задржа две години (2013-2015), а дотогаш ги бранеше боите и на Чеховски Медведи, на Динамо Минск и на Каустик од неговиот роден Волгоград.
И Горпишин и Атман и Артурс потпишаа договорите на две години со Вардар кој во новата сезона ќе влезе како бранител на трофеите во домашното првенство, во регионалната СЕХА лига и во Лигата на шампиони на ЕХФ.