Велика Британија се огради од предлогот на францускиот претседател Емануел Макрон за ограничено почетно едномесечно примирје меѓу Русија и Украина, додека Киев изрази резервираност во врска со прекинот на борбите без безбедносни гаранции, пишува Фајненшел тајмс.
Разликите се појавија по самитот во Лондон на кој големите европски сили настојуваа да проектираат единство и да развијат заеднички план по, како што наведе весникот, катастрофалниот состанок во Белата куќа меѓу американскиот претседател Доналд Трамп и неговиот украински колега Володимир Зеленски.
Макрон по самитот рече дека неговата идеја за ограничен, едномесечен прекин на огнот „во воздух, во море и на енергетската инфраструктура“ донела предност во верификацијата на намерите на Русија.
Велика Британија, која беше домаќин на самитот, рече дека британскиот премиер Кир Стармер сака да почне со мировен план за да го забрза, но сојузниците на Стармер рекоа дека едномесечното примирје „не е план на Велика Британија“.
Неименуван британски функционер изјави дека на маса се различни опции, кои се предмет на понатамошни разговори со САД и европските партнери, но дека едномесечно примирје не е договорено.