Македонските лидери ризикуваат санкции ако продолжат да го блокираат формирањето на новата влада и да провоцираат меѓуетнички конфликти, предупредуваат медијаторите на Европската унија кои работат на надминувањето на кризата во Македонија, пишува „Фајненшл тајмс“, цитирајќи го интервјуто на НОВА ТВ со Иво Вајгл.
Како што пишува весникот, Ѓорге Иванов, претседателот на државата одбива да му го даде мандатот на лидерот на опозицијата Зоран Заев.
Иванов, во сојузништво со Никола Груевски, поранешниот премиер на Македонија, го обвинуваат Заев дека сака да го поткопа суверенитетот на државата со тоа што на албанското малцинство му ветува поголеми права за употребата на јазикот.
Вајгл беше во посета на Македонија како дел од ЕУ делегацијата која помага во надминување на кризата. Тој вели дека ако ситуацијата се влоши, можеби ќе се употребат поинакви инструменти или санкции, како на пример финансиската помош.
“Фокусот на оваа ситуација дефинитивно се движи кон меѓуетнички проблем”, изјави Вајгл за НОВА ТВ.
Ова го потврдија и други официјални лица од Брисел, кои велат дека се размислува за санкции, пишува „Фајненшл тајмс“.
Како што е наведено во весникот, ова е втор пат Иванов да ризикува да се соочи со санкции. Првиот пат беше откако тој аболираше 56 лица затоа што се споменуваат во прислушуваните разговори, како можни осомнични за кривични дела.