Фудбалската асоцијација на САД му врачи отказ на Јирген Клинсман. Германскиот тренер беше американски селектор од 2011 година и го предводеше националниот тим до осминафинале на Светското првенство во Бразил. Но, тековните мундијалски квалификации не одат според планот и како се наближува крајот стануваат се понеизвесни за пласман во Русија.

Така непосакуван правец и за Клинсман и за Американците се доби по поразите од Костарика (4:0) на гости, крајно неочекуван и убедлив, и од Мексико (1:2) на домашен терен на почетокот од последната квалификациска фаза. Германскиот стручњак во неколку наврати истакна дека се чувствува сигурен на позицијата и изрази уверување дека резултатите ќе дојдат меѓутоа раководството на ФА на САД, сепак, одлучи дека е потребна промена.

„Донесовме тешка одлука за разделба со Клинсман. Му благодариме за напорната работа и посветеноста во изминатите пет години. Презеде одговорност при застанување на чело на програмата и постигна забележителни резултати. Свесни се некои историски победи вклучувајќи го и минувањето на „групата на смртта“ на мундијалот во  Бразил. Нè натера сите во американската фудбалска јавност да размислуваме на поинаков начин. Благодарни сме што помогна во развојот на нашата организација користа што  ќе ја имаме во наредните години“, се вели во соопштението на фудбалската асоцијација на САД.

Клинсман беше оспоруван во американска јавност по изјавата дека САД никако не можат да бидат светски прваци во фудбал и поради изземањето на Лендон Донован во репрезентацијата за мундијалот пред две години.

Сè уште не е обелоденето кој ќе биде негов наследник. Американските медиуми шпекулираат со поранешниот селектор Брус Арена