Роџер Федерер (38) јавно порача дека ќе игра до Вимблдон, а во наредните неколку недели ќе донесе одлука дали по турнирот во Лондон ќе остане во АТП турот или ќе ја заврши кариерата. Швајцарскиот тенисер е рекордер со 20 освоени гренслем титули, последната таква ја освои на Австралија опен во 2018 година. Летото стигна до финале на лондонската трева во кое загуби од Новак Ѓоковиќ во пет сета.
„Длабоко во себе решив да играм до Вимблдон. Сега сум преокупиран со одлуката што потоа и со настапот на олимписките игри во Токио. За тоа веќе разговарам со членови на мојот тим од кои побарав мислење. Разговарав и со сопругата Мирка. Дефинитивната одлука ќе следи во наредните неколку недели“, пренесува „Евроспорт“.
Желба догодина му е деветта титула на Вимблдон, но и олимписко злато што го постави како цел во кариерата. Оваа сезона, пак, ја продолжи со намера да одигра неколку егзибициски мечеви во Јужна Америка во ноември меѓутоа никако не сака да ги загрози подготовките за 2020 година што би можела да биде негова последна во професионалниот тенис.
„Реков дека можам само ако имам двонеделна пауза. Разговарав со фитнес тренерот Пјер Паганини. За секоја наредна сезона почнувам со тренинзи, воглавно, на 4 декември. Овојпат тоа ќе биде на 11 декември. Се е договорено. Не мора да бидам 100 отсто подготвен за АТП купот на 3 јануари. Моја цел е Австралија опен“, истакна Федерер.
Како приоритет во приватниот живот ја нагласи желбата за минување на што повеќе време со семејството, па оттука е неизвесно дали ќе реши да биде дел и од швајцарската олимписка експедиција во Јапонија.