Светската кошаркарска федерација (ФИБА) донесе одлука за која верува дека е компромисна и дека ќе придонесе за надминување на спорот со клубовите што е присутен веќе подолго време. Членовите на нејзиниот Управен одбор (УО) се изјаснија позитивно по предлогот за исплата на осигурување на кошаркарите и кошаркарките во сениорска конкуренција кои ќе добијат покана за репрезентативни ангажман. Во рамката се опфатени и играчите во младите селекции како У17, У18, У19 и У20.
„Наш приоритет е заштита на играчите кои даваат максимум за своите репрезентации. Во иднина ќе нема потреба да се грижат за финансискиот аспект при повреди што ќе значи и нивно оддалечување од паркетот. Оваа наша одлука изразува и почит кон клубовите кои ги пуштаат своите кошаркари во репрезентациите“, напиша Патрик Бауман, генерален секретар на ФИБА, за интернет страница на организацијата.
Одлуката на ФИБА значи покривање на трошовите за рехабилитација на кошаркарите од повреди здобиени за време на мечеви за репрезентациите и квалификациите за СП по новиот систем. Во предвид притоа ќе бидат земени нивните плати и времето на отсуство од клубовите. ФИБА се нафати да ги покрие и трошоците за евентуални хируршки интервенции на играчите.