Фудбалската федерација на Грција е казнета со 80.000 швајцарски франци за транспарентот „Нож, жица Сребреница“ што беше истакнат на трибините на стадионот во Пиреја за време на натпреварот со БиХ во квалификациите за СП 2018. Ова е само една од мерките што Светската фудбалска асоцијација (ФИФА) го изрече денеска за неколку национални сојузи по ноемвриските мечеви во мундијалскиот циклус. По џеб се „удрени“ и фудбалските власти во Сараево за предизвикување на нереди и палење на факели на нивните навивачи во споменатиот меч.
Фудбалската федерација на Украина, пак, ќе мора да плати 60.000 швајцарски франци за, како што се вели, во образложението, навивање со дискриминациски карактер во пријателскиот натпревар со Србија во Харков. Иако не е наведена конкретна причина, сепак, ваквата одлука на ФИФА се поврзува со инцидентот пришто беше запалено српското знаме од група украински симпатизери.
Финансиски казни ФИФА изрече и за федерациите на Островот чии репрезентации го одбележаа „Денот на примирјето“ во чест на жртвите од Првата светска војна. И покрај јасната порака за забрана на истакнување на политички пораки за селекциите на Англија, Шкотска, Република Ирска, Северна Ирска и Велс, нивните фудбалери, сепак, излегоа со црн флор на ракавите и истакнаа цвет од афион на видео-бимови на стадионите.
Од таа причина Англичаните се казнети со 45.000 швајцарски франци, Велшаните и Шкотланѓаните со 20.000 франци, Северна Ирска со 15.000 франци, а Република Ирска со 5.000 франци.