Министерот за здравство Венко Филипче истакна дека дел од стратегијата за справување со Ковид-19 е зголемување и на бројот на бесплатните вакцини против сезонски грип кои нема да бидат задолжителни. Ова, смета Филипче, е многу важна мерка за заштита од коронавирусот, особено кога станува збор за најранливите групи. Во изјава за ТВ „Алсат“, министерот најави дека ќе бидат вакцинирани сите лица постари од 65 години, а ќе има вакцини и за здравствените работници, како и за трудниците.
„Дел од нашата стратегија е двојно да ги зголемиме бесплатните вакцини против сезонски грип. Вакцината нема да биде задолжителна, но и тоа како е важна мерка за заштита од Ковид-19, особено за луѓето од најранливите групи. Ќе ги вакцинираме сите лица над 65 години, ќе има вакцина и за здравствените работници, за трудниците и за сите оние кои сметаме дека најмногу треба да се заштитат. Верувам дека ќе има добар одѕив за вакцинација. Да се заштитат барем од сезонскиот грип, зашто за тоа има заштита-вакцина. Сега гледаме колку е вакцинацијата битна, кога се соочуваме со болест за која нема вакцина“, нагласи Филипче.
Министерот за здравство рече дека се преземаат и чекори за зајакнување на болничките капацитети, за брзо тестирање, но и за зголемување на медицинскиот персонал во пресрет на евентуалниот есенски корона-бран.