Комплетен кабинет за дијагностика на коронавирусот што опфаќа една машина, кабини за изолација и тестови за 2.000 лица е холандската донација што ја обзнани министерот за здравство, Венко Филипче на попладневната прес-конференција со што двојно се зголемува капацитетот на сегашната лабораторија.
Во денешното обраќање до јавноста, тој се осврна и придобивките од пристапот на Македонија до Европскиот солидарен фонд што е особено значење за земјава, бидејќи, како што рече, „се наоѓаме во време во кое тешко се стигнува до потребниот материјал за здравствените институции.
„Одобрениот пристап до Европскиот солидарен фонд значи дека со сите земји заеднички ќе одлучуваме во заедничките постапки за набавка на апарати и материјали што се неопходни во борбата со вирусот ковид-19. Тоа што сме рамо до рамо со земји членки на ЕУ е огромна придобивка и доаѓа по одлуката за почеток на преговорите со Европската Унија. Еднакви сме во конкурентноста, бидејќи е тешко да се обезбеди потребниот материјал и опрема, нешто што е предизвик за целиот свет, а ЕУ ги отвора вратите“, рече Филипче од говорницата во Владата.