Евентуално полошо сценарио сo Ковид-19 наесен би значело поголема концентрација на луѓе во затворени простории, дополнителен број на заболени од сезонски грип што може да доведе до пренатрупување на болниците со пациенти и тоа да не може да се изменаџира. Ова сценарио, како што вчера нагласи министерот за здравство Венко Филипче, би можело да се избегне, но доколку се случи, здравствените власти ќе го дочекаат подготвени.

Вториот бран на вирусот, според Филипче, бил резултат на непочитувањето на мерките за заштита. Тој смета дека мора да има санкции онаму каде што не се почитуваат мерките. Изминатиот период, како што рече, имаше потфрлувања, не се контролирале луѓето и местата каде се организирале настани. И граѓаните мора да се свесни дека мерките треба да се почитуваат за да го заштитат сопственото и јавното здравје.

За секој еден пациент со Ковид-19, Филипче тврди дека е направено се што треба и во однос на стадиумите пред поставување на респираторна машина и во однос на третманот додека се пациентите на респираторна машина. Тој вчера соопшти дека во следните недела до две ќе се знае и дали градинките и училиштата ќе почнат со работа од септември. Веројатноста, како што рече, е голема, но да се усогласат сите протоколи.

Во земјава вчера беа регистрирани 113 нови случаи со Ковид-19. Од нив во Скопје – 35, во Штип – 23, во Гостивар – 15, во Куманово – 12, во Битола – 7, во Охрид – 6, во Тетово – 5, во Кочани и во Демир Хисар по два, а во Прилеп, во Струга, во Пробиштип, во Македонски брод, во Валандово и во Виница по еден случај.

Починаа шест пациенти – тројца од Скопје на возраст од 64 години, од 22 години, односно 83 години и по еден од Куманово на возраст од 72 години, од Струга на возраст од 48 години и од Охрид на возраст од 75 години. Дваесет и двегодишниот пациент од Скопје, како што соопшти вчера Министерството за здравство, имал Даунов синдорм. Тој бил примен во болницата „8 септември“ на 16 јули во тешка општа состојба.

Во вчерашниот извештај беа евидентирани 259 оздравени пациенти и тоа од Скопје – 103, од Штип – 75, од Тетово – 31, од Гостивар – 19, од Куманово – 13, од Свети Николе – 4, од Битола, од Кавадарци, од Кочани, од Пробиштип, од Кратово и од Ресен по двајца и од Демир Хисар и од Дебар по еден пациент.

На Инфективната клиника вкупно се хоспитализирани 83 пациенти од кои на кислородна поддршка се 49 пациенти, а еден е на механичка вентилација. Во болницата во Козле се хоспитализирани 15 возрасни пациенти позитивни на Ковид-19 и шест деца позитивни на вирусот. Во ГОБ „8 септември“ се хоспитализирани вкупно 78 пациенти од кои на респираторна машина се тројца.

Во болницата во Битола се хоспитализирани 30 пациенти, а во болницата во Штип – 48. На инфективните одделенија во Тетово, во Охрид, во Велес, во Куманово, во Прилеп, во Гостивар, во Струмица и во Струга се хоспитализирани 120 пациенти, позитивни и сомнителни на Ковид-19.

Вкупната бројка ковид дијагностицирани лица во нашата земја од почетокот на епидемијата е 11.399, бројката на оздравени пациенти е 7.480, на починати е 517, а бројот на активни случаи во земјата во моментов изнесува 3.402.

Најмногу активни случаи има во Скопје – 1.231 од кои во општина Чаир – 164, во Аеродром – 139, во Кисела Вода – 129, во Гази Баба – 121, во Карпош – 110, во Центар – 101, во Шуто Оризари – 100, во Бутел – 80. По главниот град, најмногу активни случаи во земјава има во Штип – 381, потоа во Гостивар – 283, во Куманово – 260, во Струга – 187, во Тетово – 186, во Свети Николе – 130, во Дебар – 117 и во Кичево – 109. Досега во земјата се направени вкупно 109.946 тестирања на Ковид -19.