Министерот за здравство Венко Филипче, во синоќешното гостување во емисијата „Топ Тема“ на телевизија Телма, потенцира дека зголемување од 20 отсто плата за два месеца ќе добијат сите кои биле ангажирани во лекување на ковид пациентите.
„Зголемување ќе добијат вработените во Клиниката за инфективни болести и фебрилни состојби, ГОБ „8 Септември“, во инфективните одделенија во болниците каде се лекуваа овие ковид пациенти, во Итната медицинска помош, епидемиолозите од Центрите за јавно здравје, Институтот за јавно здравје. Не само здравствените работници – доктори, медицински сестри, туку и помошно-техничкиот персонал – болничари, клиничари кои работеа во тие одделенија. Понатаму, лекарите и медицинските сестри кои ротираа во тие одделенија. Нема да земат зголемување само тие вработени кои немаат контакт со ковид пациентите во тие јавно-здравствени установи“, информираше Филипче и додаде дека се уште не е дефиниран начинот и формата на исплата за што дополнително ќе разговараат со Министерството за финансии.
Тој истакна дека во изминатите две години, вкупната сума на пари што е вложена во платите на здравствените работници и соработници, помошно-техничкиот персонал, администрацијата што работи во здравството е близу две милијарди денари.
„Вакво зголемување никогаш немало во платите на здравствените работници. Некаде лекарите специјалисти во болниците и клиниките земаат помеѓу 85 и 170 илјади денари во зависност од бројот на дежурства во месецот. Ова се нето износи. За начинот на пресметка, тоа што е финална сума што ја земаат здравствените работници се основната плата со дежурствата и додатоците кои ги имаат. Комплексност на работа, искуство, додаток ако се изложени на рентгенско зрачење, итн. Сега, платата во јавното здравство е многу атрактивна – што се докажува со тоа што имаме огромен број на доктори и медицински сестри кои сакаат да се вратат од приватното здравство во клиниките, односно болниците. Сметам дека со ова направивме сериозна инвестиција во луѓето кои работат и се еден од клучниот сегмент за да овој систем добро функционира, што впрочем се покажа и со добрата организација и одговорот со овој проблем актуелен“, изјави министерот Филипче.